новости

Ахсынньы ый 3 күнүгэр Олоҥхо уонна Хомус декадатын чэрчитинэн «Саханы үрдэтиэ Олоҥхо» диэн тэрээһин буолан ааста.

Тэрээһин алгыһынан саҕаланна, алгысчыт Айаал Гаврильевич Аргунов. Ыалдьыттары итии үүттээх чэйинэн, алаадьынан күндүлээтибит. Ол кэннэ ыҥырыылаах ыалдьыппыт Алевтина Ивановна олус интэриэһинэйдик олоҥхо туһунан кылгастык кэпсээтэ, олоҥхолортон быһа тардан туойда. Хомус күнүнэн кэлбит ыалдьыттар бары күргүөмүнэн туран «Дьүрүһүй хомуһум!» хоһоону аахтылар, хоһоон кэннэ Августина Индеева хомуска оонньоон иһитиннэрдэ. Салҕыы таабырыннары, өс хоһооннору таайдылар. Остуол оонньуутугар Александр Егоров кэлбит ыалдьыттарга маастар кылаас ыытан көрдөрдө, хабылыкка күрэхтэһиннэрдэ.

Күрэх түмүгүнэн:

Бастакы миэстэ – Светлана Ивановна

Иккис миэстэ – Екатерина Иннокентьевна

Үһүс миэстэ – Мария Дмитриевна буоллулар.

Кыайыылаахтарга грамоталар туттарылыннылар.

Тэрээһин оһуохайынан түмүктэннэ. Оһуохайы Ирина Николаевна уонна Алевтина Ивановна таһаардылар.

Ыҥырыылаах ыалдьыттарга Махтал суруктар туттарылыннылар.

Тэрээһиммитигэр кэлэн кыттыыны ылбыт дьоммутугар махтал тылын тиэрдэбит! Доруобай дьоллоох буолун!