Ыам ыйын 7 күнүгэр «Мындааба» сынньалаҥ киинигэр тыыл ветераннарыгар, сэрии сылын оҕолоругар анаан истиҥ көрсүһүү тэриллэн ыытылынна. Ытыктабыллаах ветераннары нэһилиэк баһылыга П.Ф. Румянцев, ветеран Сэбиэтин председателэ М.М. Петухова эҕэрдэлээтилэр. Ветераннар итии чэйдээх остуол тула олорон эҕэрдэ кэнсиэри көрдүлэр, Кыайыыга аналлаах викторинаҕа кытыннылар, оонньоотулар.
Аҕам саастаах биир дойдулаахтарыгар, эһээлэригэр, эбээлэригэр «Кэнчээри», «Күнчээнэ» уһуйаан иитиллээччилэрэ, Мүрү оскуолаларын үөрэнээччилэрэ Карина Оконешникова, Элина Цой, Анжела Баишева эҕэрдэлэрин тириэртилэр. Ветераннар «Сыдьаайа» ансамбль, солистар Айаал Вырдылин, Августина Индеева, Евдокия Аммосова, Иван Карпов ырыаларын сэргээн иһиттилэр. Эҕэрдэ кэнсиэргэ байаанынан доҕуһуоллаата Василий Петухов.
Үөрүүлээх тэрээһиҥҥэ улууска биллэриллибит акция чэрчитинэн И. Артамонов «Кыайыы салюта» хоһооно күргүөмүнэн ааҕылынна.
