Тохсунньу 22 күнүгэр Россия спордун бэтэрээнэ, Россия бочуоттаах донора, Саха Өрөспүүбүлүкэтин физическэй култууратын уонна спордун үтүөлээх үлэһитэ, хайыһарга Саха АССР спордун маастара, ССРС спордун маастарыгар кандидат, «Дьокуускай-БАМ-Дьокуускай» хайыһар маршрутунан айан кыттыылааҕа, Саха сирин чөмпүйэнээтин 15-с төгүллээх кыайыылааҕа, сүүрүүгэ 10000 м. дистанцияҕа Саха АССР рекордсмена, «Урожай» ДСО Киин Сэбиэтин бочуоттаах үлэһитэ, «Саха Өрөспүүбүлүкэтин физическэй култуураҕа уонна спорка үтүөлэрин иһин» бэлиэлээх, Мүрү нэһилиэгин бочуоттаах олохтооҕо Владимир Пантелеймонович Слепцов төрөөбүтэ 80 сыла.

  1993 сылтан Мүрү нэһилиэгин иһинэн Мындааба баһылыктаммыта. Бастакы баһылыкпытынан Слепцов Владимир Пантелеймонович этэ. Кини баһылыгынан үлэлиир кэмигэр элбэх өрүттээх үлэни ыыппыта. Бастатан туран, үлэлиир сиригэр өрүү баар буолара. Сарсыарда үлэтигэр кэлэригэр тэрилтэлэргэ сылдьан үлэ хаамыытын билэн кэлэрэ. Сороҕор ыалларга сылдьан ким туох кыһалҕалааҕын билэрэ.

Владимир Пантелеймонович үлэни үрдүктүк сыаналыыра, үлэһит киһини убаастыыра. Кини үлэлиир сылларыгар общественноска тирэҕирбитэ. Биэс түөлбэҕэ хас да хайысханан актыыптары талбыта. Ыйга хайаан да биирдэ-иккитэ планеркаҕа актыыбы кытыарар этэ. Бөһүөлэк ыраас туруктаах буолуутугар күүскэ үлэлиирэ, олохтоохтортон ирдиирэ. Субуотунньуктары кыайа-хото тутан салайара. Бэйэтэ тэҥҥэ үлэлэһэрэ.

Пантелеймонович киһи быһыытынан олус элэккэй, үөрүнньэҥ майгылааҕа. Оскуолаҕа, детсадтарга ыытыллар тэрээһиннэргэ өрүү кыттара, эҕэрдэтин тиэрдэрэ. Тэрээһиннэр этиллибит чааһыгар буолалларын ирдиирэ. Кини үлэлиир кэмигэр тэрээһиннэргэ дьон-сэргэ көхтөөхтүк кыттара.

2003 сыллаахха Мүрү эбэни Сэдэгэр арыытынан Мындаабаттан Бороҕоҥҥо диэри быһа сылдьарга балачча уһуннаах икки мас муостаны оҥорторбута. Муоста аһыллыыта сиэр-туом быһыытынан сири аһатан, салама ыйаан үөрүүлээх түгэҥҥэ ыытыллыбыта. Владимир Пантелеймонович бу түгэҥҥэ олус үөрэн-көтөн туран: «Бу муостанан элбэх киһи сылдьыа. Элбэх эдэр дьон көрсүһүө, онон «Таптал муостата» буоллун» - диэн эппитэ. Ол «Таптал муостата» оҥоһуллан билигин быһа сылдьаммыт оҕолуун-кырдьаҕастыын абыранныбыт.

Владимир Пантелеймонович улууска, нэһилиэккэ улахан убаастабылынан, аптарытыатынан туһанара. Мындааба инники сайдыытыгар, олохтоох нэһилиэнньэ биир сомоҕо түмсүүлээх буолуутугар элбэх сыратын ууран үлэлээбитин мындаабалар үрдүктүк сыаналыыллар. Кини үлэлээбит кэмнэрэ өрүү холобурга сылдьар.  

Л,А, Андросова