Бүгүн, олунньу 13 күнүгэр, Ийэ тыл уонна сурук-бичик күнэ бэлиэтэнэр.
Бырааһынньыгы 1996 сыллаахха СӨ бастакы бэрэсидьиэнэ Михаил Николаев олохтообута.
Бу күн сахалартан бастакы тыл үөрэхтээҕэ Семен Новгородов төрөөбүт күнэ. 1913 сыл ахсынньытыгар кини Бүтүн Россиятааҕы учууталлар съезтэригэр кыттыбыта. Онно аҕыйах ахсааннаах норуоттар оҕолорун төрөөбүт тылларынан үөрэтии уонна саха тылынан үөрэнэр кинигэни таһаарыы туһунан этии киллэрбитэ.
Ийэ тыл уонна сахалыы сурук-бичик күнүн чэрчитинэн ыытылынна:
- Олунньу 14 күнүгэр С.С. Васильев-Борогонскай аатынан улуустааҕы киин библиотекаҕа «Ийэ тылым – омугум тыына» диэн төрөөбүт тыл, сурук-бичик күнүгэр, СӨ Үлэ сылыгар, биир дойдулаахпыт Н.Д. Бурцев төрөөбүтэ 105 сылыгар аналлаах улуустааҕы «Аман өс» күрэскэ 8-11 кылаас оҕолорун ортотугар хатыһыылаах күрэс түмүгүнэн биһиги библиотекабыт ааҕааччыта Портнягин Тимур – Мындаабатааҕы орто оскуола 11 кылааһын үөрэнээччитэ (сал. Васильева Н.Е.) кыайыылааҕынан таҕыста. Ааҕааччыбыт ситиһиититтэн үөрдүбүт, өссө да ситиһиилэр кэлэ турдуннар.
- Олунньу 15 күнүгэр Мындааба орто оскуолатын 5 кылааһын үөрэнээччилэригэр, оскуола библиотекарынаан Мария Николаевналыын «Саха тыла – өркөн өйбүт» библиотечнай уруок ыыттыбыт. Оҕолорго Семен Андреевич Новгородов олоҕун, үлэтин туһунан кэпсээтибит. Ол кэнниттэн араас ыйытыктарга хоруйдаатылар, өс хоһооннорун, үлэ туһунан кроссворд таайдылар, көхтөөхтүк оонньоотулар.
- Олунньу 18 күнүгэр өрөспүүбүлүкэтээҕи «сахалыы дьыктаан» суруйуутугар кыттыыны ыллыбыт. Быйылгы Сахалыы дьыктааны СӨ Национальнай Библиотеката, М.К. Аммосов аатынан Хотугулуу-Илиҥҥи бэдэрээссийэлии үнүбэрситиэт, Арассыыйа Бэдэрээссийэтин Хотугулуу-Илиҥҥи олохтоох омуктар тылларын уонна култуураларын үнүстүтүүтүн саха тылын хаапыдырата тэрийдилэр. Дьыктаан сахаттан биир маҥнайгы тыл үөрэхтээҕэ, ураты көрүүлээх учуонай, тюрколог, талааннаах суруйааччы, тылбаасчыт уонна уопсастыба диэйэтэлэ Г.В. Баишев-Алтан Сарын төрөөбүтэ 125 сылыгар ананна. Дьыктааҥҥа Г.В. Баишев-Алтан Сарын «Киэһээ айан» айымньыттан быһа тардыы ааҕылынна. Мындаабатааҕы олохтоох библиотекаҕа 6 киһи дьыктааны суруйда.
Кыайыылаахтары эҕэрдэлиибин, кыттыбыт дьоммор истиҥ махталбын тиэрдэбин.