Бүгүн ыам ыйын 27 күнэ – Россия библиотекаларын күнэ. Бу бэлиэ күнүнэн эһиэхэ, ааҕааччыларбытыгар, эҕэрдэбитин тиэрдэбит. Кинигэлиин доҕордоһун, кинигэ – баар-бараммат баай.

«Кинигэ күүһэ» акцияны библиотекалар тэрийэн ыытабыт. Бастакы акция 2019 сыллаахха ыытыллыбыта. Акция сүрүн сыала-соруга: библиотека ааҕааччыларын ааҕыыга уһуйуу, кинигэ ааҕыыга интэриэстэрин тардыы буолар. Акция сүрүн ирдэбилэ-ыҥырыылаах ыалдьыт оҕо сылдьан сөбүлээн аахпыт айымньытын ааҕыахтаах.

НБ бастакы «Кинигэ күүһэ» акцияны Дьокуускай куорат физико-техническай лицейын үөрэнээччилэригэр тэрийэн ыыппыта. Манна ааҕааччынан Ил Дархаммыт Айсен Сергеевич Николаев кыттыыны ылбыта. «Кинигэ күүһэ» акция 2019 сыллаахха биһиги республикабыт иһинэн ыытыллыбыт эбит буоллаҕына, бу бачыымы 2020 сыллаахха Сахалин уобалаһын библиотекалара өйөөбүттэрэ. 2021 сыллаахха Крым республиката эбиллибитэ. Онтон быйылгы акцияҕа Карелия, Коми республикаларын тэҥэ Архангельскай уобалас кыттыһар. Онон сыллата акция географията кэҥээн иһэр.

Быйылгы төрдүс «Кинигэ күүһэ» республиканскай акциябыт Ийэ сылыгар ананар. Бүгүн биһиги ыҥырыыбытын ылынан ыалдьыттыы кэллэ, ааҕааччынан элбэх оҕолоох ийэ Черкашина Сардана Михайловна А.С. Сыромятникова «Хопто» кэпсээнинэн, Мүрү иккис оскуола 2 «а» кылааһын оҕолоругар аахта.