Муус устар 28 күнүгэр Саха Өрөспүүбүлүкэтин автономията төрүттэммитэ 100 сылыгар аналлаах биэчэр ыыттылынна.

Тэрээһин бастакы чааһыгар Саха Өрөспүүбүлүкэтин туһунан, историяттан бэсиэдэни Роман Яковлевич Бережнев оҥордо. Бэлиэ күҥҥэ түбэһиннэрэн «Сээркээн сэһэнньит Сөдүөт Оммуоһапка» сиэнэ Николай Васильевич, сиэн кийиитэ Валентина Ивановна Аммосовтар, эһэлэрин суруйан хаалларбыт архыыбыттан, былыр Курбуһах нэһилиэгэр олорон ааспыт ураты дьоҕурдаах дьонун-сэргэтин билиһиннэрэр дириҥ ис хоһоонноох сэдэх кинигэни бэчээттэтэн таһаарбыттарын Мындаабаларын дьонугар-сэргэтигэр кэлэннэр кэпсээн сырдатан бардылар.

Тэрээһин иккис чааһыгар үбүлүөйдээх дьоммутун эҕэрдэлиир үөрүүлээх тэрээһин ыытылынна. Бу күн, Социальнай харалтаҕа үлэлиир, общественник Вария Федоровна Решетниковаҕа 50 сааһынан Мүрү нэһилиэгин «Социально-экономическай сайдыы» знагын, Марфа Николаевна Андреева 70 сааһынан «Мүрү нэһилиэгин бочуоттаах олохтооҕо» улахан наҕараадалары Мүрү нэһилиэгин сүрүннүүр специалиһа Сергей Петрович Шепелев туттарда.

Бүгүҥҥү киэһээҕэ Марфа Николаевна бастакы «Оһуор үҥкүүтэ» айар быыстапкатын Мындаабатын дьонугар-сэргэтигэр көрдөрдө. Ыҥырыылаах ыалдьыт, Мүрү нэһилиэгин бэтэрээннэрин сэбиэтин бэрэссэдээтэлэ Мария Михайловна Петухова «Сэрии кэмин оҕолоро» улахан  кинигэни бэлэх уунна. Чугас дьоно сэмэй бэлэхтэрин, эҕэрдэ суруктарын туттартаатылар. Марфа Николаевна бэйэтэ айбыт частушкатын «Сыдьаайа» ансаамбылы кытта толордо. Остуол тула олорон уруккуну-хойуккуну санаһан, ирэ-хоро кэпсэтэн, күлэн-үөрэн ыалдьыттар астынан тарҕастылар.